Áhætta við mjúkvefsaðgerðir

Upplýsingar um áhættu og eftirmeðferð vegna mjúkvefsaðgerða í svæfingu. Slíkar aðgerðir eru m.a. geldingar og ófrjósemisaðgerðir, sár saumuð, æxli fjarlægð, kviðslitsaðgerðir, opnar kviðarholsaðgerðir og fleira.

Um aðgerðina

Dýrið þitt er að fara í skurðaðgerð í svæfingu. Allt verður gert til að tryggja sem bestan árangur en þó er mikilvægt að þú skiljir að ákveðin áhætta og fylgikvillar geta fylgt aðgerðinni.

Áhætta og mögulegir fylgikvillar skurðaðgerða almennt

• Verkir eða óþægindi.
• Blæðing eða marblettir.
• Bólga eða sýking á skurðstað.
• Þörf á frekari skurðaðgerðum.
• Taugaskemmdir.
• Blóðtappi.
• Ofnæmisviðbrögð við svæfingarlyfjum (í mjög sjaldgæfum tilvikum getur það leitt til dauða).

Eftirmeðferð og ábyrgð eiganda

Rétt eftirmeðferð er mikilvæg fyrir árangursríkan bata. Sem eigandi berð þú ábyrgð á eftirfarandi:

• Halda dýrinu í hvíld og takmarka hreyfingu samkvæmt leiðbeiningum.
• Gefa öll lyf samkvæmt fyrirmælum.
• Mæta í eftirlitsheimsóknir, svo sem umbúðaskipti, eins og dýralæknir ráðleggur.
• Tryggja að dýrið sleiki ekki skurðsár, með notkun skerms eða annarra hjálpartækja.
• Láta dýralækni vita tafarlaust ef breytingar verða á líðan eða sárum dýrsins.

Ef leiðbeiningum um eftirmeðferð er ekki fylgt getur það aukið líkur á fylgikvillum, haft áhrif á bata dýrsins og aukið kostnað við frekari meðhöndlun.

Spurningar fyrir aðgerð

Ef þú hefur spurningar um aðgerðina, mögulega áhættu eða eftirmeðferð skaltu ræða þær við dýralækninn áður en þú veitir samþykki fyrir aðgerðinni.